暴雪特約：爐石新手教學(二)

小編係上一集新手教學就提到各樣爐石新手知識，同幾樣新手玩家最易唔明既特效俾大家聽，相信都令大家清楚左爐石呢隻game基本上係點運作呀。

而小編都曾經係中途開過一個小帳，空AC做新手重玩一次，就發覺其實而家爐石新手，比其他玩家初期都更難開局呀。因為初開帳號缺少左近幾個版本既牌，新手玩家們都只能以基本牌去挑戰唔同對手，發揮係非常之有限啊！咁今次爐石新手教學呢，就會教下大家到底開左一個新AC之後呀，有咩途徑可以快速崛起啦！

1. 課金買卡包

雖然一黎講「課金買卡包」好似好怪咁，但對於未必肯用長時間黎慢慢崛起，又想一開始易啲起手，直接課金買卡包應該係最舒服既選擇。但即使係俾錢買，買邊款先好，都係一門學問黎既！

咁多版既卡包林林總總，其實都係果句 ─ 「愈新愈好」。

因為暴雪自前幾版分開左「開放模式」同「標準模式」，過舊版本既卡牌就會慢慢被移入「開放模式」，而且仲唔可以係「標準模式」使用添，所以買愈新既牌，變相就可以係「標準模式」用愈耐。而且對於新手黎講，「標準模式」係比「開放模式」更容易玩，因為「開放模式」係包埋爐石出以來所有卡牌既大亂鬥，版本與版本間有如天文數字般既配搭，對於新手黎講會係非常之困難。所以大家如果想買卡包既，不妨可以買「狗頭人與地下城」或姐係「冰封王座」卡包！

2. 遊戲內獲取卡牌與金幣

輕鬆又好拿的卡牌

新帳入手，除左「課金買卡包」呢個選擇外，第二樣野要做既野，當然就係盡快入手唔同既卡牌啦！無論你係課金與不課金，第一樣打既野，都應該會係咁多個角色既基本牌！而係基本牌都唔齊既情況下，小編都唔建議新手玩家去挑戰其他玩家黎賺角色經驗。雖然咁做係會比對上專家級旅店老闆有效率，但就未必可以有穩定發揮，所以小編都係會建議玩家先打專家級旅店老闆，每場都穩贏咁爽賺經驗，到齊基本牌再加幾包卡包，再去挑戰其他玩都未遲。

而當你打齊左咁多個職業既基本牌呢，下一步就可以去挑戰完全免費既「冰封王座」副本！當然啦… 呢個副本因為係免費既關係，比以往既所有副本都要高難度，但因為序章係劇情關卡既關係，所以玩家打完序章後隨機抽一張超強力既「死亡騎士」英雄卡牌黎開局。〈但玩家同時要注意啦，序章劇情需要，所以係會強行要玩家先死一次，大家唔好以為唔夠打就投降/退出遊戲啦～〉

而當你打完序章之後，就可以自己砌一套同果張「死亡騎士」英雄相性良好既卡組，同開始挑戰其他玩家黎解每日任務賺取金錢。

〈序章後既副本超級難打，建議卡牌唔係太齊全既玩家先多解每日任務增強卡組既多元性再進行挑戰。而且在網上亦有大量攻略教玩家點樣通關，玩家們可以先多做資料搜集再睇下自己夠唔夠打。〉

每日任務&旅店大亂鬥&競技場

每日任務係玩家可以每日都領取到一個既任務，內容可以係$40 – $100蚊，或姐係一包經典卡包。而旅店大亂鬥則係爐石既每場活動，打完可以拎一包卡包。玩家們只要日日/每個星期都解，其實好快就可以儲到唔少卡。

競技場方面，玩家就要自己恆量啦，因為如玩家實力好可以3場內贏到幾場，其實已經變相可以用幾十蚊買到一包卡包。如果勝場穩定或姐係多的話，快速利用競技場崛起都不是夢！