暴雪特約：《爐石戰記》Best of Hong Kong W2 冠軍選手推薦牌組介紹－「大大德」

大家好，今日嘅《爐石戰記》Best of Hong Kong W2 冠軍選手推薦牌組介紹將會為大家帶來TaSa#4999嘅「大大德」！

TaSa呢副牌組唔算係一副主流嘅卡組，佢拎呢套牌參加比賽嘅主要原因係希望可以用呢套節奏比較慢嘅牌組嚟捉翠玉德同卡札牧。佢認為呢套牌可以抗行現時最熱門兩套強勢牌組嘅，我哋一齊睇下吖。

牌組分析

叫得做大大德，當然就會有極大量高費牌啦，6費以上卡牌佔左接近一半。雖然高費手下佔左超重比例，但其實呢套牌有好多拉怪同加速嘅手段。TaSa指佢呢副牌擺嘅手下都係非常非常大隻，前期有好多成長手段可以將節奏加快，譬如野性成長、翠玉之花呢類德魯伊專屬嘅加速成長法術卡佢都擺滿各二，另外一張比較貴嘅滋補術滋補術亦都係擺滿，務求中前期已經可以令水晶數領先，然後就用巴奈斯、大巨蟒去拉一啲大型手下出嚟，例如亞煞拉懼、巫妖王、伊瑟拉等，嚟取得場優，不斷同對手換怪將節奏拖長消耗對方嘅手牌，最後以牌差同手下質量取勝。

Combo分析

巴奈斯與『無盡之怒』亞煞拉懼

基本上依家所有嘅「大大系列」都一定會落呢一個組合套路，因為巴奈斯戰吼能力對於新版本嚟講係一個超強連動技能，隨機拉出牌組大怪1/1分身，分身可以發動到原卡死聲或者特殊能力，好似巫妖王、伊瑟拉嘅死亡騎士、夢境卡；大巨蟒、『龍王』死亡之翼嘅死聲拉怪效果。巴奈斯嘅能力都可以做到加速令呢D後期先會出現嘅能力提前降臨，當然如果成功博到拉出『無盡之怒』亞煞拉懼分身，咁樣個優勢會再上一個台階啦。

快高長大－德魯伊

一直以來跳費成長德係一個德魯伊強大象徵，雖然改版後啟動減弱變左做一張幸運幣，但其實德魯伊水晶發育嘅能力無咩點減弱到。呢套牌組入面，加速水晶發育能力嘅有8張，如果順風嘅T5己經可以有9粒法力水晶你用。有加速成長嘅德魯伊其實玩起「大大系列」1D都唔輸蝕。

TaSa分析

TaSa係介紹呢套牌嘅時候曾同小編講其實大大德唔會比任何今版本嘅熱門牌組失色，雖然呢套牌建構費用比較貴所以令到好多人卻步。但其實佢嘅性價比真係好高，因為召喚怪嘅方式都相當多元化，唔會因為抽唔到某張main卡而卡死咩都做唔到，好多卡更係攻守兼備可以因應唔同情況發唔同效果做調整。

佢亦指出有人可能覺得呢副牌嘅防守能力比起另一啲大大牌組嘅防守力略有失色。但其實依家呢個版本有落終極瘟疫同傳播瘟疫嘅話咁副牌係防守方面亦都已經相當夠，同埋加上有1費嘅地化鱗片疊甲，只要當任何能力拉到大物出來嘅時候，例如死翼，1費發動就可以加到13甲，防快攻一流，逆轉能力係相當之好嘅。

雖然版本nerf左之後某程度上減慢左呢副牌嘅節奏，T1召巴奈斯，發效拉分身亞煞拉懼再出現一張原卡亞煞拉懼嘅勸退流已經好難實現得到，但同時快攻同打臉嘅某D主力卡亦都減弱左，所以大大德其實重係算作一線賽場Deck嚟！大家不妨參考下吖！