沒有狗餅的狗店：《FIFA》有乜好？
新專欄例牌要講一句：「大家好，我是犬夜叉！」
筆者有幸在《GREAT GAME》的專欄中出現，實在要多謝遊雲大哥比面，雖然仍然有打機，始終已離開遊戲雜誌百幾二百年，對業界各樣那樣有點脫節，又因「手淫之誤」經常打錯字，希望唔好寫完一期就比遊雲大哥踢走啦！
因為憎《WE》，所以玩《FIFA》
如題目所講，筆者好憎好憎好憎《WE(Winning Eleven)》，更曾發下毒誓再買《WE》會比人燒春袋（原因日後有機會再講），因此多年前已轉投《FIFA》的懷抱，而執筆之時《FIFA 18》剛剛見街，順理成章第一篇稿就寫寫對這個遊戲系列的評價。
唔記得由邊集開始，《FIFA》的球員操作越來越似樣，這或多或少受到《WE》的影響（在此先多謝K廠），加上這個系列一直以來的有超多聯賽的球員和球會以實名登場，順道亦可找來超級球星做代言人，這點已有著明顯的優勢。
因此，開始有很多香港玩家（尤其家用機）也像筆者一樣轉玩《FIFA》，尤其是不用像《WE》般找甚麼「補丁」就可以開機即玩，對於很多人來說就方便得多。另外，很多球星也是《FIFA》的Fans，他們亦非常著緊自己在遊戲中的能力值，是另一種有很大作用的宣傳途徑。
一碟玩成季
相信大部份玩家和筆者一樣，買足球遊戲回來主要是消磨時間和招呼朋友，尤其是自從可以網上對戰，一隻碟玩成年也不會覺得悶。不過，某些女性望住另一半成年都是玩同一款遊戲，相信她們一世都唔會明，男士們亦不用多解釋，只需答一句：「足球嘅嘢妳識條鐵咩！」（後果筆者不會負責），或者還讓她們看看下文吧。
點解《FIFA》可以玩咁耐？原因是有多個模式供玩家選擇，喜歡自閉玩的多數會選擇「職業模式」，可因應自己的喜好而選擇做領導或球員，慢慢玩的話一季可打足一個月，一年就可打足12個球季。
而網上對戰就有更多選擇，就像筆者上集就和朋友組隊玩11人對11人的「職業球會」，差不多打足一年。大家每晚吹著水打機，比賽時互相指責對方犯錯，對於筆者來講，這點是筆者玩《FIFA》的最大樂趣。
女士們，明白未？唔明可繼續睇。
另一個最大模式「ULTIAMTE TEAM」就可說是「邪惡軸心」，課金抽球員然後在全球玩家對戰時「威威豬」，EA完全捉摸到玩家的要「威威豬」心態，而有海量的實名球星才能球令球迷甘願買碟然還要不停課金。
男人打機好多時就要「威威豬」，要「威威豬」就要花時間（錢），所以晚晚踢波有幾咁奇，好過晚晚去滾吧？
「足球征程」獨立出遊戲啦！
這個是上集新增的一個模式，玩法類似是角色扮演，玩家要控制Alex Hunter在英超比賽。
在過程中Alex隨著劇情發展，有時需要回答記者、隊友或領隊的問題，可選擇火爆、冷酷和一般三個態度的答案，雖然對故事發展沒有太大影響，但就會令Ale的對外的形象有所變化，如火爆會更快捷地增加球迷數量，但領隊會唔滿意你（應該唔會搞到坐後備席嘅），選冷酷則相反，而一般就對兩者也沒有太大影響。
今集亦有不少現實球星在故事中穿插，如C.朗拿度、亨利以及湯馬士梅拿等，而同時可選擇到美職、法甲和德甲比賽（好似仲有西甲），不似上集般只能效力英超球隊。另外，今次「足球征程」有更多場境，同時又可替Alex換衫換髮型，整體來講遊戲性比上集豐富得多。
筆者覺得「足球征程」很有新鮮感，可惜的是玩一季就完，若果能夠獨立出遊戲就「Very Good」，一來可玩多幾季，同時又可以有更多現實球星登場（反正EA大把錢），二來希望劇情上可以有更多的變化，如Alex因爛混爛賭而淪落到要踢低組球會等等。
新一集有分別咩？
有讚當然要有彈，雖然筆者今集唔是玩咗好耐（頂你，隻Game都是出咗幾日），先講球員操控方面和上集分別不大，只是覺得球員轉身時靈活了，遠射易入咗。Ok！我當EA想舊玩家好快上手，但遊戲的介面基本上同上集一模一樣，莫非又是想玩家好快上手？
另外，遊戲有大量的bug令到比賽時出現很多「靈異事件」（其實幾好笑），球員唔似真人都算，海量球迷同一個樣我又算，但大家有玩開網上對戰的話，相信不時會遇到Lag機的情況。仲有上集筆者的朋友，在「職業球會」的球員成長點數突然消失，當時有很多玩家也遇上同一情況，究竟今集又會唔會重蹈覆轍…..？
=============================================
GameShuttle HK專頁：
