暴雪特約：爐石天梯卡牌介紹(五) 秘密法

今次要同大家分享既係秘密法，秘密法其實係舊版個時已經存在，但使用既人相對較少，主要係因為以前既秘密法只要打到中後期就會因為無續戰力而難以再同其他牌組對抗，但係由於新版本所加入既法師專屬傳說武器亞魯涅斯同埋新加入既秘密爆炸符文，令到秘密法突然加強唔少，再一次成為天梯上面既常客，而且因為新牌既加入，秘密法前期可以賺盡優勢，只要傳說武器準時報到，就連中後期無力既問題都迎刃而解，令到對手難以招架。

牌組運作基礎

呢副牌組起手最好有法力龍鰻，如果無法力龍鰻，黑謀會小弟加隨便一張秘密都係一個唔錯既起手，基本上除非你咁黑仔一開始就抽到炎爆術同埋火源之界傳送門，否則既話只要順住水晶數咁出牌，正常都會拎到唔少場面優勢，而到6費時如果能夠準時打出亞魯涅斯，相信就差不多大局已定，秘密法既前期佈陣同攻勢好強，正常應該可以不斷咁清空對手既手下，不斷咁加強自己既場面。直接傷害既法術如果可以既話就留返用來收頭用，可以令對方難以判斷斬殺線。

牌組介紹

單卡分析

黑謀會小弟同祈倫托法師由於佢地既效果完全一樣，所以就放係一齊講，佢地既效會都係令到呢一個回合佢地出場之後既下一張秘密變成免費施放，對於用來搶佔場優有非常之大既幫，變相就係直接多人地三粒水晶用，而且佢地本身既攻擊力都唔差，由於正常來講佢地出場之後一定會有秘密，所以對手下一回合為左要測試秘密係咩都要思考唔少，正常來講，呢兩張手下應該可以成功存活，為制造更多場面優勢打好基礎。

秘法學家算係秘密法既重點牌之一，佢可以係自己既牌組入面隨機抽一張秘密加入手牌，呢一個效果意味住可以同時一定增加秘密係手牌又可以壓縮牌組，可謂係一舉兩得，而且佢既體質亦唔差，正常來講，係可以有辦法係前期換走對手兩隻低費手下。

新版本所加入既法師專屬秘密，一張超級強勢既新卡，由於佢既出現，令到秘密法係前期既壓力增力唔少，因為佢可以有效咁阻止對手用手下佔據場面優勢，而且即使對方用低費手下去測試呢張爆炸符文，都會受到溢傷既打擊，完全係一張唔會輕易就被對手浪費效果既秘密，而且有左佢，對手就好難輕易咁打出佢既重要手下，變相可以阻礙對手既攻勢。

新版本所加入既法師專屬傳說武器，一張效果好強大既牌，因為秘密法手牌既消耗速度非常之快，所以如果有佢，就可以令到秘密法係中後期無手牌既困局解開，而且佢係回合結束時一次過抽3張牌，即係話下一回合會有4張手牌可以用，正常來講，由於前期秘密法應該已經佔到唔少優勢，再加上呢個快速抽牌，可以好容易咁用傷害法術直接收尾。

小編閒談

秘密法算係一副比較偏向快速但又唔係非常之快既牌組，佢對上中後期牌組有好強既壓制能力，但係對於完全快攻牌組例如快攻獵，快攻聖就相對難打少少，而呢一副牌組仲有一個好處，就係佢全部牌都係法師專屬牌，係砌牌個時可以節省唔少時間。