暴雪特約：爐石新手教學(三)

小編上果兩集就同大家講左爐石一啲新手既基本知識，同埋一啲新手能夠快速開荒既套路俾大家知，相信大家都已經急不及待躍躍欲試。但相信好多玩家去到砌一副牌果陣，都會疑惑，到底砌咩牌先係最「好」呢？

所以今集，小編將會稍微講一下，一啲砌牌既基本概念令大家可以更容易砌出自己岩用既套牌。

牌速的概念

牌速簡單啲黎講，就係打牌既節奏。爐石既牌如果細分，其實可以分為「前期牌」，「中期牌」，同「後期牌」。

「前期牌」好似一啲約1-3費用既牌呢啲低費用既牌，都可以歸類為前期牌，因為呢種牌可以好有效咁係牌局既前中期打出，幫助玩家快速地拎到場上既優勢。例如魚人牌組就係其中一個好多人用既前期牌組。魚人低費用既特性，可以令玩家係早期可以瘋狂打出魚人手下，並每個回合都直接對對方英雄造成傷害。如果對方係後期牌組打算一直等到遊戲中期(4-5費)先出牌，咁玩家就可以用盡全力係佢牌組未成形前就擊潰對方或姐係盡力拎取優勢。

(好似魚人牌組頭4-5回合，已經可以穩打對方英雄20血左右，再配以魚人隊長、冷光先知、溫和的大恐龍等，更可以確保即使對方打出中費手下仍然可以碾壓過去。)

「中期牌」則係一啲約4-6費用既牌咁，雖然費用係比一般1-3費用既牌為高，但因為體質優秀，如果帶有嘲諷，更可以1張牌頂起對手2-3張前期牌，令對方頓時全無輸出。

而「中期牌」，亦係小編認為全隻遊戲最穩打穩紮既牌型黎，因為1-3費既牌多數血少，一湧完只要一個清場法術就會全滅，而且前期牌組多數缺乏抽牌能力，只要一被清走，就幾乎等輸咁制。但「中期牌」卻有呢個能力去捱過最大型既全場法術或姐係一啲小型既單體法術。

以大部份「中期牌」為例，體質多數都處於5/5或姐係4/6等等既區間，可以捱過全場3-4傷既法術，亦可以捱過寒冰箭同閃電箭等等法術，呢一樣係「中期牌」一樣好大既優勢黎。

「後期牌」就係一啲極高費既牌，好似7-10費用既牌。呢啲牌特徵係高費用、體質極其優秀，同對戰局有壓倒性效果。以死亡之翼為例，12/12可以話係全隻遊戲首屈一指既體質黎。如果係對方無手牌既情況下打出，幾乎已經判左對面敗陣咁制。

但雖然呢啲高費牌係對戰局有壓倒性既效果，但打唔出既牌，幾勁都冇用。「後期牌」費用高昂則係呢種牌既致命傷。因為高費既關係，玩家一個回合幾乎就只可以打到一張「後期牌」，10費既「後期牌」甚至連你打完想補多張法術做控場都做唔到，咁亦意味住呢啲「後期牌」其實係好卡手，冇天時地利人和都好難發輝到最大既效用。

講到呢度，可能好多人都唔太知自己應該組咩牌好，因為每張牌聽落都有好有壞。但小編作為一名爐石玩家，就極力建議新手玩家可以勇於建立自己心目中既牌組，因為嘗試同除錯，係一隻卡game既樂趣黎。大家不妨就呢上述既概念，試多啲唔同既卡組配合，再砌出一套自己獨有既牌組啦！