暴雪特約：《爐石戰記》Best of Hong Kong W2 冠軍選手訪問

問=小編 T=冠軍選手TaSa

問：贏得這次比賽有何感受？

T：今次贏比賽都相當開心，其實今個版本我之前都贏過另外一個香港嘅小型線下比賽。我覺得可能自己今個版本玩得比較順手一啲，同埋今次個比賽參賽者都唔算特別強勁，我運氣都比較好啲，所以就贏左呢次嘅比賽。

問：平時會爬天梯，還是其他模式？

T：平時都爬天梯比較多，有時都會打下啲小型嘅比賽或者競技場都會玩下。

問：會看實況及爐石賽事嗎？

T：平時都有睇開實況嘅，就好似一抽入魂、SHINE、阿標呢啲，咁其實因為我自己都玩左好耐爐石，同佢地之間都係好朋友嚟，平時都會一齊傾下爐石。同埋睇比賽嘅時候主要都係會喺Twitch度睇實況，另外一啲外國實況主，又或者係一啲新牌組都會睇下。

問：最喜歡哪一版資料片及冒險章節？

T：首先先講冒險章節啦，其實我鍾意嘅兩個版本都已經退左環境，最主要嘅章節就係黑石山，因為黑石山入面有好多我自己鍾意牌組嘅Key Card喺入面。黑石山裡面會有索瑞森大帝啦，大帝係好多combo卡組嘅核心嚟，但依家都退咗環境，所以令好多combo牌組啲強度都差咗唔少；而另外仲有一張叫奴隸主，咁奴隸主呢隻生物係我以前最鍾意嘅牌組奴隸戰嘅核心嚟，依家奴隸主退左環境之後都令呢副牌組唔能夠再喺標準模式出現。

而擴展包方面呢，我就最鍾意哥哥打地地，但亦都係已經退左環境喇。因為嗰陣時哥哥打地地就啱啱推出機械呢個主題，嗰陣就覺得有機械好新奇喎。因為以前爐石未有咁多種族效果嘅牌，當出現機械時，裡面嘅爆爆博士啊、又或者有伐木機呢啲有好多運氣成份嘅牌係入面，所以係令我好沉迷係呢隻遊戲裡面嘅一個版本。

問：目前最喜愛的卡牌是？

T：依家最鍾意嘅卡就叫巴奈斯啦，佢係一張生物牌，4費3攻4血嘅身材，能力係拉牌組一隻1費生物嘅複製品出嚟，呢張卡我今次打比賽嘅兩個牌組大大德同大大牧入面都有放入去，亦係響牌組入面一張相當核心嘅卡啦。呢張卡雖然睇落好似好靠運氣成份，因為隨機拉你牌組入面嘅一隻怪出嚟，但你可以特化自己套牌組令佢拉到你想要拉到嘅生物嘅機會大大增加。可能有時只要準時4費拉到想要嘅生物就可以贏一場遊戲，當真係做到嘅時候會好爽。