《爐石戰記》Best of Hong Kong W1 冠軍牌組介紹－打頭戰

大家好，今日為大家介紹嘅牌組喺啱啱贏左第一個星期《 爐石戰記 》Best of Hong Kong比賽嘅選手阿Kin嘅其中一副牌─－打頭戰！

牌組配置

首先睇睇佢嘅牌組配置先啦，雖然佢套牌係叫「打頭」呀，但實際上佢套牌嘅定位應該係中速deck。相信大家都知道一般打頭海盜戰嘅話，都係以速攻打臉為主，要喺對手未建立到防禦線嘅情況盡快斬殺對方。但阿Kin呢一套牌組就放棄左一味沖嘅靠運靠top-deck嘅極端牌組，轉為選擇有速度之餘再可以配合一波爆發嘅玩法。雖然牌組入面基本上係無濾牌同增加手牌的嘅卡，到大量AOE或嘲諷嘅牌組就依然會好難打，牌組入面某啲嘅卡牌卻正好係為咗遇到防守型牌組而落嘅，下面將會同大家詳細咁去講解。

從水晶線可以睇到所有嘅卡都係5費以下，3費以下嘅卡更佔左18張，卡牌嘅情況唔會太容易出現。一般嘅打臉戰，衝鋒手下大約會有七隻左右，但Kin呢套牌呢就只有五位手下係有衝鋒嘅姐，南海水手選擇左落一而唔係落二，另外一般玩家鐘意用來尾刀收頭嘅「炸雞勇者」都無落。反而可以睇到好多卡牌嘅效果都係打組合用，細組合有好多唔同嘅變化，亦都方便左使用者唔洗等一張斬殺卡或者等一套combo而減慢左應有嘅節奏。

起手考量

起手模式其實同一般嘅打臉牌組無咩大分別，都係起手落恩若司的大副，戰吼裝武器，海盜派奇效果進場，然後南海水手／升級／換熾炎戰斧等套路。

但值得一提嘅係血帆教徒、納迦海盜以及綠皮船長都係可以加武器攻擊力同耐久嘅，變相對於速攻deck可以唔睇自己血量來講其實係可以積極用武器同英雄血量來換對手嘅手下，令自身手下更容易站場或者鋪場。血帆劫掠者嘅危險性大大加強，好易做到一隻10攻以上的大怪站場，另外驚懼海盜免費嘅效果亦唔需要一定等奧金收割斧先得到。

單卡分析

牌組中重有一個有趣嘅地方阿Kin落左兩張惡潮多頭蛇，小編覺得呢張5/8/8嘅手下，近期好似多左人用，雖然佢嘅負面效果係每受傷就扣自身英雄3點血量（小編亦曾睇過有人係比自己呢張手下殺死），但佢作為一張中費嘅手下，擁有巨人級8/8嘅身材，對於速攻牌組其實真係一個唔錯嘅選擇，嘅可以在中後期時同對方換手下，站場威脅亦算大，對手有可能要用兩至三隻細怪先可以殺死佢，變相用自己英雄血量來換清場其實唔會太蝕呢。

小編小意見

比起小編自己砌嘅打頭戰，其實Kin呢套真係有好大嘅出入，例如用來解場嘅斬殺、鬥毆等都無入deck，變相有時候真係好難解場，只靠一張破法者對上嘲諷系牌組真係會好難好難打，只可以用武器換人地嘅嘲諷怪。另外一般來講提供穩定輸出12點傷害嘅致死打擊都無放入牌組，亦係小編一個唔太理解嘅地方。致死打擊可以喺賣血後嘅情況下打出可觀輸出，可以用來解場又可以用來跳過嘲諷牆斬殺。當然Kin有佢自己嘅考量，亦有機會係小編嘅程度未夠…但如果比小編去選擇的話，小編最少會換走一張惡潮多頭蛇或納迦海盜來換入致死打擊。唔知你哋又點睇呢？