《變形金剛5：終極騎士》 Michael Bay之最終爆炸
「我有一刻甚至懷疑，Michael Bay用佢最後一張機會卡懲罰所有高呼鍾意睇荷里活片嘅觀眾。」
各位放心，以下落嚟無一粒字會出現劇透，唔會講劇情，因為睇Michael Bay嘅變形金剛唔係好需要理劇情。就好似睇奧運嘅韻律體操一樣，你只會睇到亮眼華麗酷弦動作，而且延綿不斷此起彼落，分別只係體操柔和平靜，《變形金剛》就係不斷爆炸，務求令你腎上腺素長期處於最高峰。Mark Wahlberg、Anthony Hopkins、新女角Laura Haddock同埋一班貌似《Stranger Things》嘅細路，全部都係呢149分鐘爆炸嘅觸機同陪襯。
LOGO未出已爆炸
即使盛傳Michael Bay已經唔係咁想拍第五集，但只要入場睇頭十分鐘已知佢依然好有誠意，電影每分鐘都充滿動感：變形金剛有變形金剛打、人類有人類打，套戲準備開始前連Paramount個LOGO都未出晒，已經有兩個巨型火球從LOGO座冰山透過IMAX巨型銀幕射向觀眾，之後就係滿地烽火，全方位爆炸，當大家以為拍緊第二次世界大戰好多飛機大炮槍時，原來只係英格蘭一場中世紀戰役。
邊個話中世紀打仗唔可以爆炸？Michael就做到喇。佢嘅誠意就係將自己最鍾意嘅轟炸、破壞、毀滅等元素，以最高質素畫面呈現於觀眾面前，而且仲係塞到滿晒，每分鐘每一秒都有打鬥、槍戰、賽車、逃命、追逐，每個鏡頭都係特技，就連坐定定喺露營車裡面都有幾隻迷你變形金剛走嚟走去，瞓覺都喺度！
150rpm黑人rap文戲
以為每套戲都一定會有文戲交待吓劇情間場一下，可以讓腎上腺回落透吓氣？唔會！密集式嘅對白就好似喺耳仔邊聽緊150rpm嘅rapping咁，好有節奏好過癮，但快到幾乎跟唔到，到跟到時其實又發現根本唔重要，因為我哋明明睇緊韻律體操，無人會想睇一個體操選手喺舞台上面演講。文戲對Michael嚟講並唔重要，佢只想快啲帶大家去下一個遊樂場同大家一齊睇爆炸，只係途中要搭兩個站地鐵，咁就聽住啲bass drum好密嘅Hip hop先。
但凡事講求參差對照，無平淡就感受唔到高潮嘅快感，連綿不斷嘅銀牙銀牙銀牙，不單止會出現審美疲勞，仲會視覺疲勞。我有一刻甚至懷疑，Michael Bay用緊佢最後一張機會卡懲罰所有高呼鍾意睇荷里活片嘅觀眾，就好似《發條橙》嘅男主角一樣，令觀眾從一個喜歡打交、暴力、爆炸嘅觀眾，喺長達149分鐘嘅調教後，變得對暴力、爆炸、荷里活商業片感到厭惡，見到爆谷都想嘔。
後記：注定最終爆炸
以上誅心論純粹妄想搞笑。事實是沒有Michael Bay便沒有荷里活版《變形金剛》，佢將一套以前我哋細個睇得好開心嘅卡通以現今科技真人化，明明一架可以變形嘅貨櫃車可以同成班人類出生入死打成一片，一般正常導演諗吓都覺得拍唔到，淨係比例都搞唔掂（你睇真人版《進擊的巨人》就知），但Michael Bay從2007年開始已經做到，仲一做就做咗十年。
今次《變形金剛5：終極騎士》成套戲一氣呵成，每個鏡頭華麗奪目宏偉壯大零瑕疵，做到真正嘅目不暇給，只要你眼球頂得順，只要你同Michael 一樣無諗過理個故仔，淨係睇爆炸方法嘅千變萬化，呢一集唔會令你失望。《5》睇得辛苦係因為佢超出咗人類三個小時接受官能刺激嘅極限，天馬行空咁諗如果電影可以好似日本深夜劇咁每集做20分鐘，將連環官能刺激斬件，成件事會更妙。
我幾相信當今世上再無一個導演好似Michael Bay咁熱愛爆炸，下一集無論找來哪一位擔當導演，都肯定唔可以將爆炸發揮到如此高度與濃度。《變形金剛 5》，注定係最終爆炸。
